لسعة دبور

xperimental broadcasting

2008-01-29T11:17:00.000+02:00

xperimental broadcasting for the new template
ya mosahel ya rab

توب علينا يارب

2008-01-15T16:10:00.000+02:00

تعرف عليها في الحديقة و طلب منها التقاط بعض الصور فوافقت علي الفور وتمايلت في رقه و الهواء يداعب خصلات شعرها وصاحبنا منمدج في التقاط الصور وتوجه الي المعمل الخاص وقام بتحميض الصور وظل يتمعن في صاحبه الصورة

ولحسن الحظ ذهب للحلاق يجدها هناك -شوف النصيب -وكمان تطلع هي الحلاق

ومن هنا تولدت شرارة حبهم و اصطحبها للاستوديو لتمضية اوقات سعيدة هناك -مش اللي في بالك لاسمح الله - رايح ياخد ليها شوية صور وبعدين هي عاوزة تساعده فتجري علي المعمل تحضر له احدي مواد التحميض لتقع المادة علي عينها و تنقل الي المستشفي و يقرر الاطباء و لاول مرة في تاريخ الطب الحديث ان يتم نقل عين اليها ويتبرع حبيبها المصور

وتخرج هي لتمارس حياتها طبيعيه بينما يعيش هو علي ذكراها بعد ما اخدت منه عينيه وحلقت له كما حلقت له في اول القصه

انا هاخد فاصل قصير اعيط فيه من شدة تأثري بالقصه الرومانسيه البوليسية

دي كانت قصة فيديوكليب من مئات الفيديو كليب اللي كل يوم ماليه الفضائيات

قصه في منتهي السذاجه والعبط و الهطل !

وكله كوم وموضوع نقل العين ده كوم تاني ومش بعيد تلاقي الكليب اللي جاي ينقل قلب مكان قلبه اللي اتجرح

توب علينا يارب

الحشرات المريضة

2007-12-29T03:06:00.000+02:00

صادقتهم طويلا وبعد ذلك اصبحت واحدا منهم وأكتشفت أنهم جميعا معقدون نفسيا.كانوا شديدي الضيق بكل شئ كافرين بكل إنسان جميع الناس خونة و عملاء ماعدا هم . كانوا يشعرون بالرضا عن أنفسهم لأنهم وصلوا للحقيقة . فكل الزعماء عملاء و كل الاحزاب موالسة وكل الصحف مأجورة و كل الناس-حتي أنا-متعاونون مع أمن الدولة وكل الأفلام تافهه وكل الكتب حقيرة و كل الأغاني هايفة وكل الموظفين مرتشين وكل النساء مومسات و كل الرجال يستحقون القتل.كانوا لايرون في الحياة الا لونين الأسود الفاحم و الأبيض الناصع ظلوا يترددون علي نفس المكان حتي جاء يوم فأختفوا كلهم لم أكن واحدا منهم يوما ما و كذلك لم يكن صديقي الطيب لم يكن يوما ما واحدا منهم ، وكان علي خلاف معهم و عندما أبديت رأيي فيهم كمثقفين قال لي لا هم لم ليسوا مثقفين انهم حشرات مريضه ! سكت و أجبته فعلا عندك حق ثم قال لي ان المثقف حقا هو من يعيش حياة الناس ويعبر عنها بطريقة بسيطه

كيلو مشكل

2007-10-11T14:46:00.000+02:00

بما اني الان اعيش في حاله شديدة من الافلاس الفكري وافتقار الي كتابه بوست وحيد الموضوع فقلت اكتب بوست مشكل اهو كلمه من الشرق علي كلمه من الغرب وكله بيعدي وكل سنه وانتو طبيبن

الريس القذافي رئيس الجماهيريه العربيه الليبيه الشعبيه الاشتراكية الديمقراطيه

المهلبيه الميه ميه ساعات الراجل ده لما بتشعشع معاه بيقول كلام موزون جدا شوف

قال ايه

دوس هنا

----------~*¤ô§ô¤*~~*¤ô§ô¤*~----------

اثناء ترجلنا انا وصديق لي في شوارع القاهرة شاهدنا عربيه شيك جدا من الانواع التي يقترب ثمنها من المليون فقالي انت ممكن تجيب عربيه زيها في كام سنة فرديت بسذاجه انت بتتكلم جد ازاي ها ؟

رد و بكل ثقه عليا و قالي طبعا اول ماتفتح عياده

اعمل زي دراكولا مابيعمل في ضحاياة !

و اطلق ضحكه شريرة من نوعية نياهاههههههههااااااااااااااااااااا

صاحب القلب الابيض

2007-09-28T18:55:00.000+02:00

بوجه شرير وقلب طفل بريء، لحق كمساري السكة الحديد رياض القصبجي بقطار الفن بعد أن قدم استقالته من وظيفته واحترف التمثيل رغم أنها كانت مغامرة خطيرة في ذلك الوقت، تخلي عن وظيفته الميري التي تدر عليه دخلا ثابتا وعرف طريقه للتمثيل مع الفرق المسرحية، وقاسي من الفقر والحرمان كثيرا لدرجة أنه طلق زوجته الثالثة لأنها لم تستطع الصبر علي الجوع.. أحبه كل زملائه في الوسط الفني خاصة اسماعيل ياسين والريحاني .. لكن حبه للتمثيل وغرامه بالكوميديا انتهي بمأساة.. فقد أصيب بالشلل وسقط علي الأرض أثناء تصوير فيلم' الخطايا'أمام عبدالحليم حافظ.. الشاويش عطية أضحكنا بأفلامه وأبكانا بمأساة حياته ملامحة الانسانية إلي حد كبير وطول قامته وضخامة جسده ووجهه العريض الحاد الخشن، كل هذه المواصفات حالت بينه وبين تمثيل دور الفتي الأول الذي طالما حلم بتمثيله وحتي عندما جاءته الفرصة لتقديم دور أحد الباشاوات كان الباشا في الأصل عربجيا.. وكان الدور يناقش قضية الباشاوات الذين اشتروا اللقب بأموالهم ليتحولوا من عربجية ونجارين وتجار وحدادين إلي باشاوات..
فبالرغم من ضخامة جثته وخشونة ملامحه التي هي أقرب إلي الشخصية الشريرة، وذلك عكس طبيعته في حياته العادية.. كان رياض محمود حسن القصبجي الشهير برياض القصبجي من الشخصيات التي لن نجد مثلها في هذا الزمن فقد قال عنه أصدقاؤه وأهله وجيرانه إنه كان طيب القلب بريئا كبراءة الأطفال، شديد الحنان وكثير العطف علي المحتاجين وهو عكس ما كانت تظهره الأفلام.وقد قدم رياض القصبجي أدوارا عديدة للسينما والمسرح ولكن شكله الضخم وملامحه الخشنة جعلت المخرجين يضعونه في قالب أدوار العصابات والشخصيات الشريرة أو الشخصيات الشعبية الكادحة من عمال وصنايعية وفلاحين وصعايدة أو دور صول الشرطة أو الشاويش عطية الذي قدمه في سلسلة أفلام مع اسماعيل ياسين وتزوج رياض القصبجي أربع مرات واحدي زوجاته كانت إيطالية الأصل وآخر زوجة له عاش معها حتي وفاته وأنجب منها ابنه الوحيد فتحي رياض القصبجي..

بعد نقل رياض القصبجي إلي المستشفي اكتشف الأطباء اصابته بشلل نصفي في الجانب الأيسر نتيجة ارتفاع ضغط الدم ولم يستطع أن يغادر الفراش ولم يستطع أيضا سداد مصروفات العلاج لأن التمثيل كان مهنة غير مضمونة وعلي كف عفريت.. وعاد إلي المنزل مع زوجته وابنه الوحيد فتحي الذي بدأ رحلة المعاناة ليوفر لأبيه مصروفات العلاج.واتجه فتحي ابن القصبجي إلي نقابة الممثلين ليطلب منها اعانة لوالده الذي لم ينقطع عن سداد اشتراكات النقابة يوما بالرغم من أنه كان رقيق الحال، وظل يؤدي واجبه النقابي بإيمان وإخلاص لكن النقابة لم تحرك ساكنا..وسمع محمود المليجي بالأمر فسارع بالذهاب إلي بيت رياض القصبجي ولحقه المنتج جمال الليثي الذي لم يكد يري رياض القصبجي طريح فراش المرض حتي خرج ثائرا علي نقابة الممثلين وقرر تكوين جمعية لجمع التبرعات لعلاج القصبجي وانضم إلي تلك الجمعية كل من المخرج فطين عبدالوهاب وكاتب السيناريو علي الزرقاني وبدأت بالفعل عملها فجمعت 300 جنيه فقط وهو ما يعادل ما يكسبه رياض القصبجي في عام حيث لم يكن دخله الشهري سوي 250 جنيها.

ولأنه فنان عظيم أسعد قلوب الجماهير فقد أرسل إليه عامل بالاسكندرية خطابا قال فيه إنه يتقاضي 16 قرشا في اليوم وأنه علي استعداد لأن يتنازل له عن نصف راتبه حتي يمن الله عليه بالشقاء!وهذه اللمحة الانسانية من العامل البسيط تعد أكبر دليل علي حب الجمهور للفنان رياض القصبجي الذي طالما أسعد الكثيرين من جمهور الترسو البسطاء وأعظم تكريم يحصل عليه الفنان في حياته وحتي بعد مماته هو حب الناس له.

في أبريل عام 1962 كان المخرج حسن الامام يقوم بتصوير فيلم 'الخطايا' الذي ينتجه عبدالحليم حافظ، وأرسل حسن الامام إلي الممثل رياض القصبجي للقيام بدور في الفيلم، كان حسن الامام قد سمع بأن رياض القصبجي قد تماثل للشفاء بعد الشلل الذي أصابه وأنه بدأ يمشي ويتحرك، فأراد أن يرفع من روحه المعنوية وكان الدور مناسبا جدا له.وجاء الشاويش عطية إلي الاستوديو ودخل البلاتوه مستندا علي ذراع شقيقته وتحامل علي نفسه ليظهر أمام العاملين في البلاتوه أن باستطاعته أن يعمل.. لكن حسن الامام أدرك أن الشاويش عطية مازال يعاني وأنه سيجهد نفسه كثيرا اذا ما واجه الكاميرا فأخذ يطيب خاطره ويضاحكه وطلب منه بلباقة أن يستريح وألا يتعجل العمل قبل أن يشفي تماما وأنه أرسل إليه لكي يطمئن عليه. لكن الشاويش عطية أصر علي العمل وتحت ضغط وإلحاح منه وافق حسن الامام علي قيامه بالدور حتي لايكسر بخاطره.ووقف الشاويش عطية يهييء نفسه فرحا بمواجهة الكاميرا التي طال ابتعاده عنها واشتياقه إليها ومضت لحظة سكون قبل أن ينطلق صوت الكلاكيت وفتحت الكاميرا عيونها علي الشاويش عطية الذي بدأ يتحرك مندمجا في أداء دوره.. وفي لحظة سقط في مكانه!وانهمرت الدموع من عينيه الطفولتين وهم يساعدونه علي النهوض ويحملونه بعيدا عن البلاتوه، وعاد إلي بيته حزينا وكانت تلك آخر مرة يدخل فيها البلاتوه وآخر مرة يواجه فيها الكاميرا!

وبعد عام من تلك الواقعة وتحديدا في 23 ابريل من عام 1963 لفظ رياض القصبجي أنفاسه الأخيرة بعد أن قضي سهرة الوداع مع عائلته وتناول خلالها الطعمية واستمع إلي صوت أم كلثوم الذي يعشقه عبر الاذاعة.ولكي تكتمل فصول مأساة رياض القصبجي التي بدأت بالتهام المرض لجسده العريض انتهت بأن أسرته لم تجد ما يغطي تكاليف جنازته وظل جسده مسجي في فراشه ينتظر تكاليف جنازته ودفنه حتي تبرع بكل هذه التكاليف المنتج جمال الليثي.. وهكذا كانت نهاية نجم الكوميديا الذي أضحكنا كثيرا مع اسماعيل ياسين درامية وحزينة.

البقاء لله

2007-08-11T01:28:00.000+02:00

البقاء لله

توفيت الي رحمة الله تعالي المدونه شيكو

علمت متاخرا لظروف عملي

انا لله وانا الية لراجعون

ادعو لها بالمغفرة و قراءة الفاتحه لها و لأموات المسلمين

اذان المغرب برعايه فودافون

2007-07-24T12:48:00.000+02:00

مع بدايه التنافس الإعلاني بين شبكتي المحمول في مصر و انضمت اليهم اخيرا الشبكه الثالثه ليزيد التنافس المحموم بينهم خرج علينا احد شيوخ الفضائيات في برنامج فتاوي القهاوي ليعلن انه لامانع من تأجير المآذن لتلك الشركات لاستخدمها في الاعلانات و انشاء ابراج تقويه وبرر قوله بأن المساجد سوف تستفيد من ذلك الريع و تنفق علي نفسها منه

ومن هنا اسجل خوفي من تزايد تلك الفتاوي و التي لا اساس لها إلا البحث عن الشهرة و الفرقعه الاعلاميه وياخوفي لييجي اليوم اللي تلاقي فيه إعلان بالبنط العريض بيقول " مع تحيات موبينيل الراعي الرسمي لصلاة الضهر" أو تفتح التليفزيون و تلاقي صورة الجامع و مكتوب عليها " كان هذا أذان المغرب برعاية فودافون"واخشي أن أعيش لأري اليوم الذي يتم فيه منع مشتركي موبينيل من دخول المسجد اللي بتأجر مأذنتة فودافون او يوضع اعلان في المسجد " عزيزي المصلي صلّ السنة و احصل علي دقيقة مجانا من اتصالات

هذا البوست برعاية موبينيل اول شبكة محمول في مصر

هل.....؟

2007-06-30T22:15:00.000+02:00

هل يموت الانسان و تبقي مشاعرة حيه بيننا

ام يموت الاثنان معاً ام تموت المشاعر و صاحبها حياً يرزق

لا أدري

ما تعريف السعاده من وجهه نظرك؟

هل هي الصحه، المال ، الزوجه الصالحه ولا الابناء

هل هي احداهم ام خليط من كل هذا ام شئ اخر

لا أدري

هل معني الوحدة ان تكون بعيداُ وحيداً عن اصدقائك ومعارفك

ام ان تكون بينهم وتشعر انك وحيد وغريب ام الاثنان معا

لا أدري

الف هل وهل تتدافع في راسي بحثا عن اجابات فطرحت جزءاً منها لعلي اخفف من ذلك الضغط الرهيب في راسي

انا مسافر

2007-05-09T21:19:00.000+02:00

اصدقائي المدونين انا رايح منحه علميه لمده طويله شويه وراجع اخر الشهر اللي جاي وطبعا مش هكون فاضي ان اكتب اي بوستات او اعلق علي اي بوستات

طوال فترة السفر

واشوفكم ان شاء الله بعد ماخلصها ودلوقتي سمعني سلام بودعك

الخليفة

2007-05-03T22:54:00.000+02:00

من المآسي مايمتد في بطون التاريخ عدة مئات من السنين .. لكن اخطر مأساة في التاريخ هي إن كل خليفة هو مصدر الحكم وينبوع المعرفه ونموذج الكمال ويظل كذلك حتي يموت... فإذا مات فهو منبع الجهل ومصدر الظلم والنموذج الأكبر للفساد والإستبداد . مأساة حقيقية ولكن سببها الخليفة نفسها إن نمط الحكم العربي يجعل من الخليفة أو الوالي او السلطان المللك المعصوم فلا يسمح بأحد بإنتقادة وهي حي يرزق.مسموح للجميع بأن يبالغوا في مدحه وفي حصر مآثرة وفي تسليط الضوء علي مواهبة والأعتراف بعبقريته وتدور الأسطوانة علي هذا الوجه مادام الخليفة حيا فإذا مات الخليفة قلبوا الأسطوانة علي الوجه الآخر وهو دائما عكس الوجه الأول والمسافه بينهم لا تقل عن التي بين الأرض و المريخ

كلنا هناكل لحمة

2007-04-25T17:57:00.000+02:00

لحمه صيني في الأسواق وبـ 13 جنيه الكيلو

خلي الشعب ياكل لحمه تلاقيه نسي شكلها ايه

الخبر ده مش نكته أنا قريته في الجمهوريه في العدد الصادر بتاريخ 24/4/2007

البري بري بئ

2007-04-10T23:46:00.000+02:00

البري بري بئ

بيلق في الشكمانات

قال و انا هئ

دوخت السبع دوخات

رحت للميكانيكي

قاعد يلعب فيكي

وانا قاعد مستني

وهو نايم تحتيكي

البري بري بئ

مقطع من اغنيه شعبيه لاحد المطربين الشعبيين

تأمل الكلمات والمعاني الرقيقه

ابو حنجله وماريا

2007-04-01T22:39:00.000+02:00

أبو حنجلة فارسٌ مغوار…ومقاتل شرس

وزوجتة امرأة مرابطة ولكنها كبقية النساء وقتذاك، صعبة المراس،قاسية الملامح

وكانت إذا تضايقت راضاها أبا حنجلة بمعلقة شعرية لا تقل عن سبعين بيتا موزونا وبالكاد ترتضي

وابن سعفلة رجلٌ حكيم وصاحب علم وشيخ جليل ولكن زوجته كانت تقلب جيوبه قبل أن تقلب معدته وكانت تأخذ مصروف البيت لتشتري من الثياب أغلاها ومن الدواب أفضلها بالدنانير الذهبية التي كانت تلطشها قبل أن تحنّ عليه بقبلة من خلف ستار وعلي مضض، وكانت لا تتنقل سوى بناقة 8 سلندر بينما كان يخوض هو المعارك ويحرر البلاد والعباد من على جحش صغير متواضع

المرأة كانت ولا زالت سببا لصدامات حضارية…وحسبي أن زوجته هي الأخرى كانت صعبة المراس، تثقل كاهله بالطلبات من لحم وخضار وفاكهه وجواري يقمن بكافة أشغال البيت عنها
وكانت الابتسامة لا تظهر على وجهها سوى في المناسبات والفتوحات الإسلامية اياها

في المقابل أبا حنجلة تعرّف على (ماريا) في الأندلس بعد فتحها - أي الأندلس طبعا وركز معايا كويس - وماريا كانت ترتضى بوردة حمراء أو شالِ من حرير أو حتى تنتشي لكلمة طيبة وماريا لم تطلب الشعر ولم تتذوقه بل كانت تتذوق فحولة أبا حنجلة وحكمة ابن سعفلة وكل تلك الأسماء التي تحمل أدب الصحراء

استغنى أبا حنجلة عن المعلقات التي كان يراضي فيها زوجته وفتش بساتين الورد في حارات إسبانيا بعد أن فتحها المسلمون عن زهرات حمراء وخضراء وصفراء وبيضاء وعن قيثارة في السوق حتى يكتمل زمان الوصل في الأندلسِ
وصار الحب يترجم أسرع من الأبيات الطويلة والقصائد وأسرع من الحكمة التي يطوِّعها ابن سعفلة، وكان الحبُ متبادلاً متعة لا يمنّ بها أحدهم على الآخر

وكذلك في العصور القديمة…أي قبل الانترنت والنسكافيه والكابتشينو والساتالايت… تنعّم الفرسان بفتوحاتهم مع ماريا واختلط الحابل بالنابل في الهند والسند والقسطنطينية وصارت أدوات الحب أسهل بكثير وصارت كلمات الغزل رشيقة كقوام ماريا

المكسيكيون (أو المكاكسة كما يسميهم صديق لي) يحملون ملامحنا ويصر صديقي على أن أصولهم عربية وأن أبي حنجلة وأبي سعفلة وكل (الأبوات) تركوا أخوة لنا في تلك الديار وأنهم - أي أجدادنا - حسّنوا النسل، ولم أعرف أي نسل على وجه التحديد

أحد الخبثاء قال: ربما سحب (المكاكسة) كل النسل ولم يبق لنا سوى حطام من الجينات نتوارثه على مضض، ولم يبق لنا من تاريخ وفحولة ومعارك وبطولات سوى سيوف صدأت وأسلحة فسدت في مخازنها وعبارات عشق مهترئة وحبات (فياجرا) في الهزيع الأخير من الليل وعروبة لا نتذكرها إلا إذا مررنا من امام (سيخ شاورما) أو سمعنا طشطشة) قلي الفلافل أو شممنا رائحة شواء الكباب و الكفته عند الحاتي…
عروبة وتراث عريق لا يطرق بابنا إلا في حضور راقصة حتى لو كانت مستوردة أو معطوبة

أصاب بصدمة حضارية وصداع فسيولوجي ومغص جيوسياسي كذلك الذي أصاب أبي حنجلة في الاندلس عندمارأيت زعيما عربيا يستعرض حرس الشرف…بشرفي انه استعرض طابور كامل من حرس الشرف، تساءلت بطبيعة الحال: وهل بقي شرف رفيع وحرس للكرامة المهدورة والمغتصبة…؟! أعاد الله أيام الوصل في الأندلس….

أهلا بيك في أرض الحضارة في أرض البلالة

2007-03-25T19:28:00.000+02:00

ايييييييييييييييييييييييييييييه

شعبولا شعبولا

المدونه مغلقه لفترة

2007-03-18T01:26:00.000+02:00

المدونة مغلقه الي مدي لا يعلمه الا الله

ومتوقف عن التدوين

و اترك العنان لخيالكم لتتوقعوا ماهي الاسباب

تحياتي لكم جميعا

توضيح بخصوص اللقاء

2007-03-11T02:43:00.001+02:00

نزولا علي رغبات الساده المعلقين بخصوص اللقاء ووصفهم بأن البوست السابق اللي كتبته هجومي وبطريقه شديدة
احب ان اوضح وجهه نظري عندما انتقدت كنت انتقد بعض مما حضروا اللقاء و ليسوا ال60 مدون كلهم وقلت فيما معناه ان ليس كل من حضروا اللقاء سيئين بل ان كلهم محترمين عدا القليل جدا و منهم من أعرفهم من اللقاء السابق وهم 16 مدون او تربطني بهم صله عن طريق المدونات والتعليقات المتبادله ومنهم من كنت اتمني أن أعرفهم لما سمعته عنهم من الحضوراو لمسته من احترامهم للاخرين و انتقادي ليس علي اساس الشكل و لا المظهر الخارجي فالتجمع ده ثقافي مش اختيار ميس و مستر بلوجر يبقي اللي جاي عارف ان تجمع ثقافي مش رانديفو فمن الاولي احترام الحضور
بعض من المواقف اللي ذكرت في البوست هي من الواقع و ليس من تأليفي ومحض خيالي
انتقدت اللقاء لانني كنت اتمني ان يكون افضل من ذلك و اقدر الجهد المبذول فيه حتي يخرج بهذا الشكل الجميل وتخيل نفسك معك لوحه فنيه قيمه جدا تعبت فيها جدا و جاء شخص غير مبالي بها لوثها ببقعه صغيرة جدا تكاد لاتذكر و اضاع جزء من مجهودك الثمين ماذا سيكون رد فعلك ؟ ها قولي ؟ اكيد طبعا هتمسك في زمارة رقابته علشان اللي عمله!! مش صح ؟ انا اعتبرت اللقاء ده هو اللوحه
و اذا لم اكن انا مقتنع باللقاء و فكرته لما حضرت من الاسماعيليه الي القاهرة مرتين رغم ظروف عملي المجحفه الا انني تحاملت علي نفسي لاحضر و انا لا انتظر شكرا من احد علي حضوري
و البوست ده مش اعتذار علي قدر ماهو توضيح وجهه نظر و اعترف ان اسلوبي كان قاسي بعض الشئ او قاسي جدا فمن وجهه نظري ان اللقاء مازال طفلا صغيرا و يحتاج قدرا من الرعايه و القسوة احيانا حتي لايحيد عن اهدافه و ينمو كما هو مخطط له
ارجو ان تكون وصلت وجهه نظري

ضرب نار حتي الصباح الباكر

2007-03-06T03:58:00.000+02:00

في بداية ظهورها في الاسواق كانت تستورد من امريكا ،كانت تباع الحبايه الواحدة بـ 45 جنية وكانت تأتي مهربه وحاليا عندما تدخل أي صيدليه تجد شاب في العشرينات او بداية الثلاثينات طول بعرض وصحه ماشاء الله زي التور و بجوارة راجل مهكع لو نفخت فيه هيطير ومن غير ماتنفخ خالص انت بس انوي وهو هيطير بالنيه و الاتنين بيطلبوا نفس الحاجه.

طبعا اعتقد انكم عرفتوا هما بيطلبوا ايه؟ اكيد طبعا فيجا او فياجرا

لاحظت من واقع خبرتي الطبية ومن كثير من اصدقائي الصيادله ان الناس اصابها هوس الحبايه الزرقاء و اصبحوا متخيلين انها تجعل من الرجل سوبر مان في الفراش و الرجل الذي لايقهر و ضرب نار حتي الصباح الباكر و عاصفة الصحراء و حاجات من النوعيه دي وبحكم احتكاكي بالمجال الطبي كنت من فترة قريت دراسة مصغرة عن الفياجرا فقلت تشاركوني المعلومات دي و انا هبسطها لكم
الاسم العلمي : سيلدانفيل سيترات

الاسم التجاري : ماتعدش بس اشهرها الفيجا و الفياجرا

Tadalafil (Cialis) - Vardenafil (Levitra)ومن نفس المجموعه الدوائيه توجد ادويه اخري

وينطبق عليها ما ينطبق علي سيلدانفيل سيترات مع بعض الاختلافات البسيطة وبدون الكلام عن طريقه العمل التي قد لاتهم كثيرا

الاستخدامات لاشهرهم وهي الفياجرا

erectile dysfunction اول سبب و اهمهم فشل الانتصاب

ارتفاع ضغط الدم الرئوي

وظاهرة راينود

موانع الاستعمال

امراض القلب وخصوصا فشل القلب

ومن يتعاطون ادويه تحتوي علي النيترات

الفشل الكبدي الشديد

الفشل الكلوي الشديد

من يعانون من الضغط المنخفض

من اصيبوا مؤخرا بجلطات دماغيه او ازمات قلبيه

امراض شبكيه العين الوراثيه

الاعراض الجانبية الخطيرة

اخطرها انخفاض ضغط الدم

موت اجزاء من عضله القلب نتيجه عدم وصول الدم لها بشكل كافي

زياده ضغط العين

الموت المفاجئ

الاعراض الجانبيه العامه

صداع

الشعور بضربات القلب

عدم قدرة العين علي التعرض للضوء

تشوش في الرؤيه

عسر الهضم

العطس

ومؤخرا اشتكي بعض المواطنين الامريكان ممن استخدموها من فقدان النظر
اتمني اني اكون قدرت اوضح جزء ولو بسيط عن الدواء ده

و في النهاية احب اقول لكل شاب احترس و مش تاخد ادويه انت مش تعرف ايه اضرارها و خليها للي محتاجها و للي مابيعرفش وفي نهايه البرنامج احب اسمع اغنيه الصراحه راحه ياخويا و انت مابتعرفش لشاكيناز

علي قهوة البورصة تقابلنا

2007-02-25T20:17:00.000+02:00

ارتديت ملابسي و اتجهت نحو العاصمه مستعدا للقاء وبحلول الساعه السادسه و النصف تقريبا كنت علي قهوة البورصه في وسط البلد تقابلنا و جلسنا وبعدها صرخت مناديا بصوت عال علي صبي القهوة طالبا عصير مانجو بما اني مشجع اسماعيلاوي اعشق كل ماهو اصفر و اكره كل ماهو احمر حتي عصير الفراوله وبدون مقدمات وجدتهم جميعا ينظرون لي و اعينهم يتطاير منها الشرر لانهم وللاسف كلهم كانوا اهلاويه ويكرهون كل ماهو اصفر و يعشقون كل ماهو احمر المفروض يكون في روح رياضيه فقعدت ساكت و بلاش احتكاك بيهم اصلهم من يوم الـ 3 وهما
اعصابهم بايظه !ياه قلبهم اسود قوي الأهلاوية ماعلينا تعارفنا وعرفتهم بنفسي واثناء الحديث ذكرنا اسم الاستاذ احمد شقير ولم ننته من الكلام حتي وجدناه يقف امامنا سائلا بوجرز مش كدة ؟ وطبعا كان حضورة من احدي اهم عوامل نجاح اللقاء وحضر ايضا الفنان التشكيلي الكبير الاستاذ حسني سليمان و اثرانا بفكرة الكبير و ثقافته الواسعه

---------------------------------------------------------------
فاصل إعلاني ---------------------------------------------------------------

وايضا لا نستطيع ان ننسي الجانب النسائي و صاحبة الحضور المتميز ياسمين والتي ادارت اللقاء ببراعه واتقان شديد واول من اخرجت فكرة اللقاء للنور ولم يخلو كلامها من بعض القفشات الطريفه وخصوصا حكايه المسنجر الظريفه جدا "يعني مصطفي فهمي ياخي" كانت افضل القفشات علي الاطلاق وايضا من العناصر النسائيه سمراء النيل الفتاة الغير معقوله تسيدت اللقاء بخفه ظلها و مرحها الشديد والغريبه ان كل المدونين بلا استثناء اجمعوا علي معرفتها ولقطات سريعه علي طريقه احمد حداد و التصوير الفوتوغرافي علي طريقه المحترفين والقلب الابيض الكبير و الحب الابدي لمصر حضر مصر هي امي و كان معانا ابراهيم معايا و الذي انطلق في شرح لماذا نفسه وسمي مدونته أنا وأنا و يبدو انه لم يقتنع بفكرتي عندما عرضت عليه ان يأتي لعيادة النفسيه في مستشفي الجامعه الاحد و الثلاثاء خصوصا انا هذة الحالات نسبه شفائها كبيرة جدا وتصل لـ 100%. وتصفحنا سريعا احدث كتاب له و حاليا مطروح في الاسواق .

-----------------------------------------------------------------

فاصل اعلاني

----------------------------------------------------------------

وايضا حضر الشباب الجميل اللي فكروني بشبابي من خماشر تمناشر سنه لما كنت قدهم كده وكانوا مميزين جدا ويحتاجون جميعا بوست لكل واحد منهم علشان اتكلم عن انطباعاتي عنهم وهم راسبوتين التزم الصمت طوال اللقاء لم يتحدث الا قليلا. أريدك انثى انطلق يشرح لماذا سمي مدونته هكذا و انا كنت فاكر في الاول انه بيقول الكلام ده لراجل علشان كده كنت كل مادخل مدونته اقول استغفر الله العظيم شوف الواد عاوزنا نبقي ايه وطلع في الاخر انا اللي كنت فاهم غلط هو مش كان عاوزنا احنا الرجاله هو كان عاوزها هي تبقي انثي يلا حصل خير. فروزن لف ساحر الكلمات الصغيرمحدش فاهم حاجه جاء وكان من افضل من تحاورت معهم فهو مستمع اكثر من ممتاز.ايجلز الفتي الشاب الواعد طاقه كامنه و وبدايه قويه في عالم التدوين بيشوي ذي اليان اختلفنا في الاراء الا انه من اهم صفاته انه يحترم اراء الاخرين حتي وان اختلف معهم .مايكل لا تنتظر وابدا رحله الكفاح سريعا باي شكل وفي اي مجال واعتقد ان الجميع اقنعك بذلك واخيرا حضر كلمه و كيف تحيي الموتي ولم يكن لي حظا من التحدث معهم و اتمني ذلك في المرات القادمه ان شاء الله

صور من اللقاء

روابط المدونات من حضروا اللقاء

الاستاذ حسني سليمان - مدونة أفنان الفنون

الاستاذ أحمد شقير - مدونة حكاوي اخر الليل

ياسمين - مدونه سكاي لايت

مايكل محسن - مدونة مايكلليتو

راسبوتين- مدونه راسبوتين

مصر هي أمي - مدونة مصر هي أمي

ابراهيم معايا - مدونة أنا و أنا

أريدك انثى - مدونة أريدك انثى

كلمة - مدونة كلمة

كيف تحيى الموتى - مدونة كيف تحيى الموتى

مدونة محدش فاهم حاجة - why me

The eagles مدونة - The eagles

ahmed_h مدونة - ahmed_h

Frozen love مدونة - Frozen love

The alien مدونة - The alien

الدبور - مدونة لسعة دبور

تاج من حفصوتشا

2007-02-19T01:03:00.000+02:00

وصلني تاج من حفصوتشا منذ فترة مش طويله اوي و انا كنت وعدتها ان انا هجاوبه بعد البوست اللي فات و دلوقتي لازم اوفي بالوعد وندخل علي الشغل الكبير

اية اللي حيحصل لايميلك لما تموت ؟

مش عارف حاليا بس اعتقد انه هيتقفل من الشركه سواء ياهو او هوت ميل

اديت الباس وورد لحد قبل كده؟

لا طبعا

اسمك؟

اسامه

اسم الدلع المشهور في وسط اصحابك؟

أس أو سمسم

عمرك؟

ليه بقي كده ! 25 سنه وكام شهر

برجك؟

ولو اني مش بحب موضوع الابراج ده بحس انه خزعبلات بس يلا انا العذراء

مجالك او مجال دراستك ؟

المجال الطبي

شخصيتك نوعها اية؟

شخصيه برجوازيه متسلقه متقلبه المزاج هوائيه

المود بتاعك؟

حسب الجو المحيط انا بكيّف نفسي عليهالسفر بالنسبة لك؟متعه وهوايه

وقت فراغك بتعمل فيه اية؟

يا مع اصحابي علي اي كافتريا او علي الكومبيوتر و النت

الاكلة المفضلة؟

مكرونه باللحمه المفرومه و رقاق باللحمه المفرومه برضو

الصفات اللي خدتها من ماما؟

الطيبه و الذوق و حب الناس وتقوي الله

الصفات اللي خدتها من بابا؟

العصبيه و سرعه البديهه

اكتر 6 حاجات بتكرهها؟

الغباء الاستهبال عدم الانضباط اللامبالاة الكدب الظلم

اكتر 6 حاجات بتحبها؟

البساطه التواضع اتقاء الله البحر الموسيقي الهاديه التفكر في امور الدنيا

الشغل بالنسبة لك؟

روتين يومي وواجب مقدس

اية الكومبيوتر والانترنت بالنسبة لك؟

اصدقائي في الفراغ عندما لا اجد اصدقائي حولي

امررها لكن من ساقته قدماة لمرور من علي التاج ده ايوة انت يا اللي بتقري انا بوجه التاج ده ليك و انتي كمان
واخيرا وعد مني لمحمد عبد الغفار وانجي بأن التاج اللي بعتوة هيكون الرد عليه قريب اذا لم تتغير الظروف ان شاء الله

من غير عنوان

2007-02-09T18:33:00.000+02:00

بما إني غير قادر علي كتابه تدوينه طويله لانني ببساطه اعاني من حاله من الافلاس الفكري الحاد فالتدوينه دي غير مترابطه الافكار تماما واحسن لك مش تقراها لانها غير مفيده علي الاطلاق

هنكر ليه ؟

سبب الاسم ده بايخ جدا وقصه سمجه لابعد الحدود !!

طبعا لان الكابتن الكبير هنكر كان دائم اطلاق التصريح الخنفشاري المعروف بيه " 100 جنيه لكل لاعب" وفي مرة واحد من زمايلي في الفريق بيقوله فين ياكابتن الـ 100 جنيه اللي قلت عليها رد عليه كابتن هنكر و ببساطه " انت صدقت يا عبيط انا كنت بهنكر عليكو علشان احمسكوا في الملعب" ومن يومها ارتبط اسمه بالكلمه دي و انتشر الاسم في كل النادي ليحمل اللقب الجديد كابتن هنكر

بايخه مش كده ؟

ابو كف رقيق وصغير

وانا في الشغل اثنين من العمال ضربوا بعض و واحد منهم راح عامل محضر في القسم و كتب اسمي شاهد!!! يادي النيله انا مش بحب القلق ده كلمة الشرطه بتعملي حساسيه ماعلينا رحت و قابلت المأمور و لقيته موقف الاتنين المتهمين قدامه و بيسأل واحد منهم فرد بصوت عالي شوية و كان فيه مخبر واقف اسمه بكار - اسم الشهرة بتاعه كده - كان وزنه حوالي 120 كيلو علي الأقل وكان كفه في حجم فرده الجزمه مقاس 47 وفي لمح البصر سمعت صوت بيطرقع تقولش قنبله انفجرت في الاوضه و الواد قاعد في الارض بيعيط وبيقولي "معلش ياباشا انا اسف" انا كان قلبي في رجليه لابو كف رقيق و صغير يمسي عليا انا كمان وينوبني من الحب جانب بس الحمد لله ربنا ستر وعدت سلم.

أم العيال

كنا في الغردقه في رحله و رحنا احد الشواطئ و علي الشط كان المنظر مش و لابد...ستات زلط ملط يادوب قطع صغيرة من القماش تكاد تستر عوراتهم!! استغفر الله و اعوذ بالله من الشيطان الرجيم كان معايا ساعتها واحد صاحبي هو متجوز و مستشيخ شويه فسألته هو احنا لو بصينا مش حرام ؟فقالي و اقنعني بصراحه ان النظر مش حرام ، لان صنف الستات الزلط الملط من غير العرب،و التمتع بهم ليس حراما لأن الله خلقهم للاستمتاع ..صحيح.. رحمه ربنا و اسعه وفضله علي العباد ليس له حدود وصنعه ربنا في الستات دليل علي عظمته!!!انطلق الشيخ و الحق يقال وانا كمان ننظر مادام الشيخ افتانا بانه حلالوسكت الشيخ مرة واحده و لم يتكلم ساعتها احسست ان لسان حاله يقول " الله يرحمها ام العيال - علي اساس ان الرحمه للحي و للميت- كانت مثل سيد قشطه اذا مشيت واذا جلست كأنها قبه سيدي الشيخ عطوة و اذا نامت كأنها جثة مضي علي طلوع روحها 10 ايام و انهي سكوته الطويل بجمله " يلا ياعم ننزل البحر هو احنا هنقضيها فرجه و لا ايه "

ميت جنيه لكل لاعب

2007-01-28T18:15:00.000+02:00

بما ان دي اول تدوينه ليا فقلت ابدأها بحكايه يمكن قديمه شويه بس يارب تعجبكوا
المكان : استاد شركه جاسكوا للغاز الطبيعي و المواد البترولية - السويس الزمان: من كام سنه كده
كنت زمان بلعب كورة في انديه درجه تانيه وانتقل من فريق لفريق مرة بموبايل 3510 الوان و مرة بالفين جنيه النادي اخد الف و انا اخدت الف و انتهي بيا المطاف الي فريق في الاسماعيليه اسمه "المواني" تابع لهيئه قناة السويس وجه اليوم الموعود وكان عندنا ماتش في السويس مع فريق جاسكوا علي ملبعه و للعلم ملعب الشركه بين مباني الشركه و المحاطه بسور كبير
المهم مش هطول عليكوا الفريقين متعادلين لغايه الدقيقه 80 و هوب فاول علي قوس التمنتاشر
نادوا العبد لله لاني كنت باك و رجلي طرشه و رحت شايط الكورة بانتقام عدت من الحيطه وجت في رجل لعيب من جاسكو وهوب في الجون هييييييييييييييييييييييه هيييييييييييييييه وجون وجون وجون قونبله قونبله علي راي كابتن لطيف

وشويه وسنتر فريق جاسكوا و كلنا نمنا قدام الجون حفاظا علي الهدف الثمين
المهم المدرب بتاعنا اسمه " كابتن هنكر" مش تستغربوا اسمه كده و الاسم ده ليه قصه هبقي احكيها لكو بعدين الكابتن هنكر و اقف علي الخط تقولش الجوهري وعمال يقول خطب حماسيه من نوعيه هانت يارجاله شتت شوط نام في الارض و في عز حماسه و راح قايل بصوت عالي " 100 جنيه لكل لاعب " قال ايه علشان يحمسنا لغايه كده كويس اللي مش كويس بقي اهو
كان في راجل قاعد برة جنب الكابتن هنكر سمعه بيقول كده راح قايله " ياراجل روح هاتلهم فلنات وشورتات بدل الهلاليل اللي هما لابسناها زي الشحاتين " كابتن هنكر سمع الكلام ده والدم غلي في عروقه و أخدته الجلالة و راح شايل كف ايده رافعها و ساكع الراجل قلم علي وشه طررررراااااااخ وقاله " انت راجل قليل الأدب" الناس اتلمت ودقيقتين وراح الحكم مصفر معلنا انتهاء الماتش و فوزنا بهدف يتيم للعبد لله لعب الحظ و الصدفه دور كبير فيه . طبعا كان فيه 2 ظباط و كام عسكري وأمين شرطه تأمين للمباراه فجأة لقيتهم اختفوا و اختفي الحكم و المساعدين و بقينا في الملعب لوحدنا طبعا ده فال مش كويس خالص
و شويه لقينا كام واحد من عمال الشركه لابسين العفريته الزرقا بتاعت الشغل ماسكين عصاين وجايين علينا كانوا حوالي 30 واحد وفين يوجعك يا معلم واديلوا واحنا كنا بنجري زي الفراخ في الملعب منهم وانا كنت بجري لغايه ماوصلت رايه الكورنر رحت ساحب رايه الكورنر الخشب ومناول بيها الراجل اللي كان بيجري ورايا راحت دماغه مفتوحه وجريت زي الصاروخ بعيد عنه وانت وفي النهاية عدت وربنا سلم بكام كدمة وسحجات علي الماشي كده في كل جسمي تقريبا ماعدا وشي - الحمد لله - وبسببها غبت عن الكليه 4 ايام
وبصراحه ربنا العمال كان عندهم ذمه وضمير وهما بيضربوا تقولش امن مركزي وانطلقوا في تنفيذ مهمهات الضرب علشان خاطر ينولوا رضا البيه
اه نسيت أقولكوا ان الراجل اللي ضربه كابتن هنكر بالقلم هو البيه مدير الشركه
وكل اللي حصلنا بسبب كابتن هنكر و ايده المبروكه